کراچی: پولیس کی مختلف علاقوں میں کارروائیاں، 7 ڈاکو گرفتار

کراچی پولیس نے مختلف علاقوں میں مقابلوں کے بعد 7 ڈاکوؤں کو زخمی حالت میں گرفتار کرلیا۔

کراچی:(تم نیوز،نیوڈیسک،جرائم،12اپریل2022) پولیس کے مطابق ڈالمیا سیمنٹ فیکٹری روڈ پر پولیس کے ساتھ مقابلے کے بعد 3 ڈاکوؤں کو زخمی حالت میں اسلحہ، 15 موبائل فون اور  موٹرسائیکل سمیت گرفتار کرلیا گیا، گرفتار ملزمان عبداللہ، حمزہ اور مصطفیٰ شاہ فیصل کالونی اور الفلاح میں ڈکیتی، اسٹریٹ کرائم اور کار لفٹنگ کی وارداتوں میں ملوث ہیں۔

ادھر پولیس  نے کورنگی میں افغان بستی کے قریب مقابلے کے بعد ڈاکو کو زخمی حالت میں گرفتار کرلیا، ملزم کے 2 ساتھی فرار ہوگئے،گرفتار ملزم کی شناخت احسان کے نام سے ہوئی  جب کہ فرار ملزمان میں خالد اور طاہر شامل ہیں، گرفتار ملزم احسان سے اسلحہ، موبائل فون اور موٹرسائیکل برآمد کیا ہے۔

دوسری جانب لیاقت آباد تین ہٹی،لانڈھی اورسخی حسن قبرستان کے قریب پولیس نے مقابلوں کے بعد 3 ڈاکوؤں علی جان، محسن اور عبدالطلحہ کو زخمی حالت میں گرفتار کرکے اسلحہ،موٹرسائیکل،نقد رقم اور موبائل فون برآمد کرلیے۔